中環出更：葉劉愛女赴美升學 扮嘢派對歡送
行政會議兼立法會議員葉劉淑儀愛女葉榮欣（Cynthia）即將要遠赴美國史丹福大學，修讀番佢兩年前已報讀嘅工商管理碩士課程，新民黨為咗歡送佢，搞咗個盛大嘅cosplay派對，派對上除咗葉劉喺頭上戴咗個大大嘅波點蝴蝶結扮米妮，新民黨前副主席史泰祖史醫生扮牛仔胡迪都入形入格，仲有總裁余衍深（Marcus）就扮海盜，總之大家都娛人又娛己。
話晒Cynthia都係新民黨黨員，亦曾任該黨策略主任，大家前日就喺中環為Cynthia搞咗個歡送派對，出席呢個派對嘅唯一條件，就係要扮成迪士尼入面嘅人物，所以葉劉就扮做米妮老鼠，史醫生扮做胡迪，該黨副主席田北辰唔怕大熱天時，一於扮「毛毛」，而元朗區議員黃卓健（Legward）就扮做米奇老鼠。派對設立兩個「獎項」，分別係最佳服裝獎同最hea服裝獎，獲得前者就有獎勵，獲得後者就要罰着住獨特嘅服裝，喺餐廳附近跑一圈，所以都咪話唔刺激。至於邊個攞最佳服裝獎？卓妮就唔知喇，不過據聞東區區議員李文龍就攞咗最hea服裝獎！
Cynthia好驚喜
Cynthia同卓妮講，話真係好多謝各位同事為佢搞呢個派對，覺得好surprised（驚喜）、好開心，但同時又好唔捨得，不過無論如何，佢會喺美國完成呢兩年課程先，再考慮返香港搵咩類型工作。
而史醫生就話，好替Cynthia高興，所以佢特意去中環石板街買咗呢套牛仔服裝，襯番派對嘅主題，另外就送咗個迷你投影機畀Cynthia，希望佢日後發表論文時用得到喎。
卓妮