政情：李少光遇竊 年尾抱孫沖喜
保安局前局長李少光早前爆出家中失竊事件，損失數目都唔少，認真倒霉。我哋日前喺跑馬地巧遇光哥，佢話損失嘅大部分首飾都係太太同女兒嘅嫁妝，其中唔少現時已經升咗值，好似有件太太嘅翡翠首飾，相比當年已漲價二、三十倍，而部分首飾背後嘅價值同意義就更加重要。為咗搵番失竊嘅珍貴首飾，佢太太仲不惜去當舖畀錢贖番部分失物，只可惜有啲失物已流咗去外國。
男定女大賣關子
雖然不幸發生失竊事件，但光哥一家喺年底會有一件喜事沖一沖喜，就係光哥可以再抱孫喇！光哥話，囡囡預計年底會分娩。至於會係孫仔定孫女，佢就一如以往咁話要賣個關子先喎。
講到近況，光哥話近兩年做咗港區全國人大代表後，現時工作好多時係發表意見為主，而好多內地個案嘅處理方法及習慣都同香港好唔同，但佢亦已開始慢慢習慣。
佢又話，因為中環及金鐘耳目眾多，相反跑馬地黃泥涌道嗰頭嘅餐廳就安靜得多，開會傾偈亦比較方便，所以佢平日都好鍾意去嗰頭食飯。