政情：「微服」遊迪園 梁敬國被認出
商務及經濟發展局副局長梁敬國（Godfrey）自從喺立法會發生冇人認識佢嘅事件後，人氣急升，好多人都對佢印象深刻咗。日前Godfrey着住短褲及Polo恤，再加上頂Cap帽，現身迪士尼樂園。雖然Godfrey同平時官仔骨骨形象好唔同，但喺人海中，我哋一眼就認到佢。
話時話，Godfrey着成咁，唔通微服出巡？佢急急澄清話，千祈咪咁講，佢主要職責係工商嗰邊，旅遊方面有旅遊事務專員負責喎！其實當日佢一家三口入樂園玩，仲話自己係廿四孝老竇，小朋友話想去迪士尼，佢就每年至少去一次滿足小朋友心願。如果Godfrey對立法會議員都好似做老竇咁有求必應，咁實冇人唔識啦！
（葉華英攝）