中環出更：密會「歐元之父」 肥佬黎又想攪局？
捲入政治捐款醜聞嘅壹傳媒老闆黎智英（肥佬黎）黑氣纏身，最近仲有閒情逸致招呼朋友，同九九年諾貝爾經濟獎得主、已經年屆八十二歲嘅「歐元之父」蒙代爾（Robert Alexander Mundell）密會，莫非又密謀攪局？上星期卓妮發現佢哋前後腳在「香港國際舌針研究治療中心」出現，而前日又見佢兩個分別現身中環食飯，走嗰陣又係前後腳，但蒙代爾就坐肥佬黎名下座駕離開，證明關係密切。
蒙代爾八月七日抵港，由肥佬黎左右手Mark Simon親自揸車去機場接機，蒙代爾坐住輪椅、一臉倦容，同行仲有佢老婆同兒子，蒙代爾之後同家人及隨行人員上咗Mark Simon架車及另一架房車，去咗金鐘一幢服務式住宅。
翌日早上十點幾鐘，以輪椅代步嘅蒙代爾穿着藍色Polo恤同深色長褲，喺老婆、兒子、外籍助手及一名香港男子陪同下，一行五人乘坐一架七人車去中環德成大廈「香港國際舌針研究治療中心」。中心由舌針泰斗孫介光教授主理，孫出名治療腦癱、腦退化症、中風，肥佬黎係中心嘅常客，經常被人見到佢現身治療中心。
前後腳現身舌針治療中心
蒙代爾喺中心一間診療室逗留咗一個鐘，之後由助手攙扶出診療室，只係行咗短短幾步，蒙代爾已經表現得非常吃力，最後坐番上輪椅，被送到同一大廈五樓做物理治療。過咗一陣，就見肥佬黎去到德成大廈，佢逗留咗約二十分鐘先離開，係唔係去五樓同老友蒙代爾會面，就不得而知喇。不過，肥佬黎寫嘅文曾經透露，一二年佢曾經飛去紐約參加蒙代爾嘅八十歲壽宴，證明雙方關係好好。
一個疲態畢露 一個黑口黑面
直至一點幾鐘，蒙代爾同屋企人及隨行人員離開，但喺街等座駕接送時，蒙代爾愁眉深鎖，露出疲態。之後蒙代爾去咗港安醫院逗留咗一個鐘，先返回金鐘嘅服務式住宅。
前晚肥佬黎同蒙代爾又前後腳喺中環出現，見肥佬黎六點幾鐘去咗花園道科達中心一中菜酒家，但面黑黑，心情好似唔多好。直到八點幾鐘先見佢落樓，過咗五分鐘後，就見蒙代爾落樓，坐肥佬黎名下座駕離開。
卓妮