潮流興瘦身，女士減肥各出奇謀，有人戒鹽戒油、有人勤練瑜伽、有人食減肥藥……五花八門，各適其適。不過咁，減還減，健康始終最緊要，特別係網上出售嘅減肥藥物，質素冇保證不特止，仲可能有毒添，亂咁服用隨時禍從口入。
唔係危言聳聽，醫管局數字顯示，舊年一月至今年六月，共有十六名女子服用問題減肥藥而要入院，受害人全部係十五至廿九歲年輕女性，因為服用網上購買、用泰文包裝嘅套裝減肥藥而不適，其中多人要留醫，有人食到腦癇要入深切治療部，有人甚至因精神錯亂，曾服藥企圖自殺添。正如專家話齋，「減肥套裝」內有抗抑鬱藥，「鐵人食咗都會死」，受害人執番條命，都算不幸中之大幸咯。
講開又講，網上出售嘅問題藥物食壞人，已經唔係咩新聞。呢，早前有位筋肉男因為雙腳麻痹求醫，一度入住深切治療部，幾乎全身癱瘓添，經追查後發現佢曾經網購減肥藥。仲有吖，日本藥物近年備受熱捧，有人公然透過拍賣網站放售，其實好多都要向當局註冊至可以合法出售；至於網上賣壯陽藥、墮胎藥等，更加係多如牛毛，消費者難以分辨，隨時中招。
咁就奇怪嘞，係人都知食錯藥分分鐘搞出人命，非同小可，當局應該加強監管，從嚴把關至係o架。可惜吖，每次有市民網購藥物出事，當局例牌話會收集情報，調查跟進，但次次都係不了了之。其實，網售禁藥問題早就氾濫成災，衞生署自舊年一月至今年六月，處理咗廿六宗非法銷售減肥藥個案，當中十六宗正正係網上銷售嘅，證明當局所謂調查跟進，擺明係大隻講。
港產官僚唔監唔管都算嘞，最離譜係主動降低藥物出售門檻。本來法例規定藥物出售前，要由藥廠聘用嘅藥劑師「守尾門」並且簽署，點知當局竟然建議修例，只要持有指定課程資格嘅人士就得，亦即係話非專業人員甚至一般藥廠職員都可以操刀。咁搞法，簡直攞市民生命安全較飛。
所以話，官僚靠得住，豬乸會上樹。除咗網上購藥陷阱處處，醫學美容監管漏洞百出，同樣係危機四伏，事故頻生。近年發生多宗嚴重美容事故，造成人命傷亡，市民紛紛要求當局立法規管，特別係釐清醫療同美容嘅界限，弊在當局一味歎慢板，今年底至開始諮詢，完成立法程序估計仲要等多五年，問你服未。
功夫茶諗極都唔明，藥物監管又唔係登陸火星，照計唔係咁難啫，港產官僚咁都做到甩甩漏漏，問題百出，唔通佢哋亦係食到非法減肥藥，搞到瘟瘟沌沌、渾渾噩噩！