魯迅說：「由我造出來的酸酒，當然應該由我自己來喝乾。」然而由庸醫造出來的醫療事故，卻不是由庸醫來承受，受害的是已在疾病威脅前飽受輾轉折騰的病患者！
香港嘅公共醫療事故層出不窮，自前廢官周一鑊掌食衞局以來，醫療失誤之多之奇，已使人有「亂花漸欲迷人眼」之嘆！想不到人事更新，醫療事故依然「迷人眼」！莫非應了車公靈籤啟示：君不須防人不肖，眼前鬼卒皆為妖！群魔亂舞，何須待明年，今已大禍臨頭喇！
大家睇吓聯合醫院嗰位「醫生的醫生」，其病理報告「錯漏百出」到嚇死人冇命賠！由去年十月至今年五月簽發嘅二千一百多份病理報告，涉及一百一十八份出錯，其中十七份報告屬病理診斷錯誤，包括一宗「一睇就知」子宮有死胎組織嘅個案，被當成是受賀爾蒙影響而出現嘅子宮內膜變化，咁明顯容易見到嘅死胎組織佢都睇漏，令老朽懷疑佢是否半醉半死來診斷啲病理？
呢位病理科女醫生個牌都唔知點考番來；講真，有關人員又話事件屬罕見，又話病理學培訓過程嚴格，要六年培訓，兩次均有海外專家參與的考試……
之不過，咁「嚴格」嘅訓練，睇怕比起民間黃綠醫生也不如，黃綠醫生睇症，發燒即是火，咳嗽就是風寒，有痰就是肺熱，腰疼即係腎虧！如此斷症，分分鐘叻過呢位所謂「醫生的醫生」！
香港已經淪落到「眼前鬼卒皆為妖」，連受過咁嚴格訓練嘅專科資格女醫生都咁得人驚，有癌當無癌，認真死得人多！畀佢簽發嘅病理報告，睇怕個病人醫唔醫都已一隻腳伸入了棺木！
據說庸醫的藥方可以辟鬼，比鍾馗像還靈，若然，女庸醫嘅病理報告，應該有另類用途！