政情：公民講場：「坐正」無望 戴健文醒吓喇！

香港電台內部一直希望由內部晉升出任廣播處長，本來一一年九月「空降」出任處長嘅政務官鄧忍光，將於下月中任滿三年，按政務官「三年一調」嘅不成文慣例，鄧忍光即將告別港台，將會係副廣播處長戴健文「坐正」處長嘅最佳時機。不過，港台內部通告好似一盆冷水潑向戴健文，因為原來經過內部晉升選拔程序後，結果係未有人選適合晉升廣播處長，而處長一職再作公開招聘，換言之戴健文「上位」無望。其實戴健文依家年屆五十八歲，將近退休年齡，佢一而再同處長一職擦身而過，相信係時候醒吓喇！