政情：穗保育更勝港 嫻姐感慨
立法會放暑假，工聯會陳婉嫻就寄情考察工作，早兩日靜靜雞帶埋工會老友一行十幾人，北上廣州考察當地嘅文物保育發展。一直支持保育古蹟嘅嫻姐，眼見廣州市政府對保育發展比香港走得更快、更前，感慨香港依然停滯不前。
嫻姐日前應邀上廣州幾日，喺廣州當局帶領下參觀全國重點文物保護嘅南越王宮博物館。呢個博物館係中國秦朝造船、西漢時期南越國王宮嘅遺址。當地市政府深明發展及保育需要平衡，不惜叫停發展，南越時期嘅木製水閘遺址先得以保留，而遺址上蓋依家就興建購物商場。
嫻姐慨嘆廣州市至少專設文化局處理當地古蹟文物事宜，雖然香港都有古物古蹟辦事處，但喺保育議題上始終唔夠「牙力」，連香港市區最後一條圍村「衙前圍村」都敵不過發展嘅硬道理已被迫遷拆，難怪佢感慨咁深嘅。