政情：百仁慈善跑成立獎學金
百仁基金每年都會舉行「Be Hero慈善長跑賽」，按慣例會將善款分別捐畀慈善組織，但據聞佢哋將會一改傳統，唔會捐畀善團喎，莫非慈善跑唔再係慈善活動？百仁基金主席李文俊（Raymond）話，明年嘅慈善長跑賽所得嘅善款將會用來成立獎學金，每年資助本港八間院校共十六個學位，往後隨着善款上升，資助學位數目亦會相應增加。
Raymond話，現階段計劃八大院校每間兩個學位名額，之後就每間院校資助三個名額，就算係醫科生獲得呢個獎學金，六年學費照樣資助，讓年輕尖子都可完成理想。咁點樣先攞到呢個獎學金呢？佢話係按申請者嘅成績及表現而定，再由獎學金嘅遴選委員會選出合資格嘅申請者喎。
至於遴選委員有咩人？除咗身兼嶺南大學校董會主席嘅行政會議成員陳智思外，暫時仲有經濟發展及勞工局前局長葉澍堃及港區全國人大代表馬豪輝，其餘成員則陸續邀請緊。