中央對政改「落閘」之消息，近日喺本地政圈甚囂塵上，究竟真定假到月底人大常委會開會就知。香港本來得幾位港區人大代表列席常委會，但突然好多人大代表都爭相報名希望列席，無非都係想等人大常委拍板後，隨即喺北京替中央保駕護航。不過，呢啲工作唔係個個人大想做，聽聞有啲人大只係「被列席」而唔敢反抗。
人大常委會嚟緊本月廿五日開會開到三十一日，而三十六名港區人大，已有十幾人報咗名列席會議。個個爭住去，你估真係好想開會坐足咁多日咩，講到尾都係想「領功」，等政改框架公布後幫中央講好說話。有啲較溫和嘅港區人大，就唔認同呢種做法。好似廖長江就係一例，據聞佢對今次列席耍手擰頭，但由於佢身兼立法會議員，所以一早「獲邀列席」。
另一人大查史美倫年頭報名時，根本唔知八月底係講政改，所以佢亦唔多願意列席，只係怕麻煩同唔想得失人而無打退堂鼓。中央疑似「落閘」，亦令唔少溫和建制派即時收聲，好似人大代表劉佩瓊，尋日臨時取消同民主黨會面。