政情：肥佬黎小學雞 對號入座回應訃告

拍片不斷「問候你阿媽」

話說尋日有人刊登一則「訃告」廣告，話一個別名叫肥佬黎嘅六十五歲男子「黎志英」，祖籍廣東順德，今個月七日患愛滋病及多種癌症併發不治身亡，尋日就係呢位肥佬黎嘅頭七。有人話死者頭七會回魂，但「黎志英」未回魂，壹傳媒肥佬黎尋日就一早彈起身，在旗下壹傳媒網站現身「發噏風」，自拍短片兼加埋電影及配樂效果話：「想我死呀，咁容易咩！因為我都唔似有AIDS（愛滋病）！」

壹傳媒肥佬黎仲好似小學雞咁，一輪嘴呼籲登「訃告」廣告人士繼續「咒」，話如果想咒佢死好容易，就係要一路繼續去「咒」，一路「問候你阿媽」，「加埋你阿媽啲功力，咁你一路問候你阿媽，我可能真係畀你咒到都唔定！」之後肥佬黎重複話：「繼續去咒啦，繼續問候你阿媽，唔好意思呀，使你失望，Bye Bye！」真係小學雞到無人有，講到亂晒龍。

回應捐款醜聞 唔清唔楚

壹傳媒肥佬黎今次火速拍片回應一則同佢無關嘅「訃告」廣告，同佢喺回應政治捐款醜聞上嘅「依依哦哦」表現截然不同。相信大家都仲記得當日佢亦曾經在壹傳媒網站承認有捐款畀泛民主派議員，點知部分牽涉政治捐款醜聞嘅立法會議員唔認有收過佢錢，仲質疑佢點解會咁講，而佢之後又無再澄清，總之唔清唔楚。何解佢今次忽然對一則關於「黎志英」的「訃告」廣告咁上心呢？莫非反映佢對死亡嘅恐懼？

肥佬黎條自拍短片仲引來一啲網民跟風，跟住佢喺壹傳媒網站「發噏風」，搞到網站要提醒班網民注意法律責任，呢啲咪係又要威，又要帶頭盔囉！肥佬黎咁小學雞，唔知佢今日又會否在旗下報章刊登啟示澄清自己無愛滋呢？