政情：中環出更：蔡冠深豪氣 巨藍鰭宴客
重約六十公斤嘅巨型藍鰭吞拿魚，前日登陸香港。巨魚嘅主人，正是人稱漁業大王之後嘅香港日本經濟委員會主席蔡冠深（Jonathan）。為宴請日本農林水產部大臣林芳正，兼順便慶祝逾二百個日本食品參展商齊出席香港美食節，Jonathan專登安排劏條巨魚慶賀一番。
劏巨魚好考工夫，操刀嘅係有三十年烹調日本料理經驗嘅香月利久師傅，見佢氣定神閒拎出幾把大小不一嘅利刀，僅花十分鐘已將魚身分成多件，手法乾淨俐落。林大臣睇見，都忍唔住豎起拇指讚好，更指住「大拖羅」及「中拖羅」兩個部分，直言係佢嘅摯愛，請師傅留番件畀佢喎。
日大臣雞泡魚標本回禮
Jonathan嘅大家姐蔡紹霞亦有份幫手競投巨魚，佢話為保持魚香及鮮味，刻意不經雪藏，直接將巨魚由築地魚市場空運抵港。不過，講到投魚價錢，Jonathan笑言唔記得，只知尺寸比佢大一倍嘅巨型吞拿魚，曾喺日本創下一百萬港元身價的拍賣紀錄。
巨魚難求，當林大臣發現條吞拿魚原來產自其家鄉山口縣，既笑到見牙唔見眼，臨走前送上一個用山口縣雞泡魚製成嘅魚標本作回禮，話多謝Jonathan咁有心思。
品嘗完新鮮吞拿魚，Jonathan細訴月前剛成功「拆彈」。早前越南發生排華暴亂，其廠房亦險遭殃，幸得當地美籍廠長臨危不亂，知道暴亂後飛車回廠，第一時間將廠外嘅中文字招牌拆下，並向路過嘅暴徒揮手打招呼，暴徒見佢係外國人，喺廠外兜了三個圈便離開，最後廠方絲毫無損，認真好彩。
卓妮