港鐵宣傳口號係「心繫生活每一程」，講就好聽嘞，但所謂嘅「生活每一程」，可能同大家嘅定義有好大出入，如果唔係，又點會搞到事故頻頻，幾乎每一程都令乘客叫苦連天吖。
即係咁，如果港鐵事故淨係導致延誤，咁都好啲，最弊係如果每一程都提心吊膽，咁就大吉利是喇。唔係講笑o架，港鐵諗縮數，計劃喺現正動工、全長三公里、共有三個車站嘅西港島線採用「車站分組控制運作模式」，當中嘅堅尼地城站將成為三個車站嘅總車站控制室，餘下嘅西營盤站及香港大學站則如同「衞星站」，所有車務監控交由堅尼地城站獨力支撐，實行遙距指揮咁話。
港鐵嘅如意算盤係咁嘅，採用遙距運作模式後，西營盤站及香港大學站將不設車站控制室，只保留消防控制中心，唔會有職員長期駐守；站長崗位亦不再固定，改為四處巡邏。至於堅尼地城站總控制室則會設置十多部屏幕，實時監察三站情況，每更安排兩名職員當值咁大把。換句話講，兩個職員將會負責睇三個站，問你怕未。
大家都知，港鐵每日乘客數百萬，西港島線通車後勢必更加擠擁，由兩個職員睇晒三個車站，隨時掛一漏萬都有之，萬一出事，試問邊個孭得起？咁都唔止吖，有前港鐵員工仲爆料話，西營盤站及香港大學站分別深入地底五十米及七十米，但又不設獨立車站控制室，萬一有突發事故，兩個職員根本搞唔掂。嗱，連消防處都對「衞星站」嘅安排表示關注，證明有問題喇。
港鐵有傳統運作模式唔用，係都要採用所謂遙距運作模式，簡直係阿茂整餅，冇嗰樣整嗰樣。正如立法會議員話齋，咁做除咗可以減省成本，實在諗唔到仲有咩好處。仲有呀，「衞星站」嘅站長冇固定崗位，乘客出咗事都唔知去邊度搵人幫手，你話係咪大整蠱吖！
當然啦，港鐵絕對唔會承認諗縮數嘅，仲話類似嘅遙距模式亦有喺康城站及迪士尼線採用喎。咁就好笑嘞，西港島線無論規模定載客量都比康城站及迪士尼線大得多，根本唔可以相提並論，何況迪士尼線經常發生事故，港鐵咁樣做即係搵乘客生命安全開玩笑啫。唔係以小人之心度君子之腹呀，港鐵過去已經多次被揭發為節省成本而採購便宜零件，又不斷將維修服務外判，如果話西港島線嘅做法唔係諗縮數都冇人信啦。
計功夫茶話齋，今時今日咁嘅服務態度點得o架。港鐵淨係識得加價，服務質素就每況愈下，家陣仲要諗縮數，再咁落去，遲早爆大鑊嘅咋！