建制派政黨或社團每逢搞撐政府活動，為湊人數都會用盡辦法氹人去參加。人民力量立法會議員陳志全（慢必）話，佢有朋友參加工聯會（工記）興趣班，近日都收到短訊叫人參加嚟緊嘅周日遊行。講講吓，慢必都差啲有機會收到呢類訊息，事關二十年前佢曾經去工記業餘進修中心學泰文，當時都有人游說佢做會員，話報讀課程平啲，但佢最終冇入會，同工記可算係緣慳一面。
講開泰文，慢必話自己當年係「泰國通」，識講又識寫泰文，又成日去曼谷等地，之但係過咗咁多年，乜都還番晒畀老師囉！
呢排好多議員趁暑假去旅行，慢必都唔執輸，日前出發外遊到星期日先返港，幾日後又再飛去德國一個星期出席佛教論壇，期間有機會同西藏流亡精神領袖達賴喇嘛會面喎。身為佛教徒嘅慢必話，今次見達賴純係宗教活動，到時應該唔會講政治議題喇！