政情：有相為證：豆腐渣立會 假天花漏水

立法會大樓自落成以來一直被指係「豆腐渣」工程，因為每逢大雨都會滲水入大樓，亦試過因為消防灑水系統開啟，啲水漏足幾層樓，秘書處職員於是趁唞暑期間做執漏工程，但尋日連場紅、黃雨又再導致滲水。我哋尋日行經立法會議員入口，見到工程人員封起一邊門，同時架起圍板同高台，幾名工人維修緊假天花（圖），假天花隔籬仲有啲水漬添，相信係尋日大雨造成滲漏。職員透露，執漏工程會分期進行，之後就改封另一邊門維修假天花。