學民思潮召集人黃之鋒日前喺社交網站公開中學文憑試成績，仲話五科成績合共有十九分，已經獲香港公開大學（OU）政治及公共行政學系取錄。相信呢個消息會令本港八大院校校長鬆一口氣，事關傳聞上月八大院校校長有個聚餐，言談間提起近年喺政圈冒起嘅黃之鋒，原來個個都話怕咗佢，驚佢搞事多過讀書。有校長仲講笑話，寧願捱義氣出獎學金送佢去第二間大學讀書咁話。
除咗校長們對黃之鋒耍手擰頭外，其實部分大學學生都唔多歡迎佢。黃之鋒日前話唔想啲人講咩「黃之鋒搞政治讀唔掂書最後咪要入OU」。有傳佢嘅言論挑起部分OU學生嘅神經，該校有校友會考慮緊發聯署聲明，對黃之鋒標籤同貶低OU表示遺憾。另外，早前黃之鋒被城市大學嘅副學士課程取錄，該校學生會就好擔心，驚佢喺迎新營玩遊戲時嫌三嫌四，又驚佢選學生會喎。其實大家一齊讀書啫，又唔使諗得太多嘅。