政情：新民黨盼田二少 戰超選
建制派喺前年立法會選舉中，五席超級議席只能奪取兩席，所以選舉「協調人」一直想靠新民黨嘅中產票源贏取第三席，但該黨副主席田北辰（田二少）始終心大心細，寧願穩陣啲繼續參選新界西直選。據聞最近唔止有關協調人有咁嘅諗法，連新民黨上下都有聲音希望田二少披甲出選超級議席，一來希望擴張勢力，二來可替該黨測試全港知名度，但未知田二少敢唔敢博。
新民黨近年不斷擴闊版圖，除喺新西密密吸納區議員做樁腳外，年頭仲同喺沙田割據一方嘅公民力量結盟，令該黨一下子擁有三十名區議員，已穩握參選超級議席嘅入場券（須獲十五名民選區議員提名）。據聞黨內唔少人包括主席葉劉淑儀在內，都想勸田二少出選超級議席，目前只欠田二少首肯。
倘當選 新西勢順利交棒
綜合多名黨內人士分析，田二少出戰超級議席有幾個好處。首先該黨目前只在港島區及新界東、西擁有區議會議席，但九龍東、西卻未能開拓，若田二少出選超級，有助該黨測試水溫。因為屆時田二少喺九龍區嘅得票，可以話係該黨嘅基本票源，從此便推算出該黨喺九龍區有幾大支持度，方便評估日後是否派人出選有關選區。
其次好處是由於建制派票源盡歸民建聯、工聯會所有，預料田二少出戰超級選舉時所得嘅全港票數，將係新民黨重要數據。如果全港五區得票較其餘建制派候選人高，絕對令新民黨升價十倍，有助葉劉淑儀喺一七年爭取入閘選特首時有更多籌碼在手。
最後一個好處就係假如田二少成功奪得超級議席，其新界西空缺亦可騰空予黨內第二梯隊，由於現時該黨喺新界西已有不少區議員，若明年區選再添數席，預料搶攻新界西一席難度不高，亦令黨內第二梯隊順利接班，到時田二少就有資格接掌成個新民黨，正式做一哥。
風險高 田區選後再打算
呢條數計落有辣有唔辣，但風險都幾高，一旦失敗隨時引起連鎖效應，所以依家田二少唔敢輕舉妄動，暫時先以連任區議員做目標，等明年區選結果明朗後再作盤算。眾所周知，由於立法會超級議席候選人必須為民選區議員，如果連區議員都連任唔到，真係乜都唔使講嘞。