中環出更：「仁濟車神」 籌款實「駕」勢
城中籌款活動多籮籮，最緊要好玩。仁濟醫院早前舉行「海外學生仁濟夜慈善餐舞會」，由一班面孔青澀、返港放暑假的大學生柴娃娃籌辦，夠晒朝氣及活力。賽車手出身的「仁濟男車神」葉恭正（Paul）及熱愛踩單車的「仁濟女車神」湯振玲（Jacqueline）等年輕總理都有到場。講起有創意的籌款點子，Jacqueline心思思想搞個單車籌款活動，一於將嗜好化為愛心行動。
Jacqueline話，呢個諗法好初步，事關有太多細節要研究，例如選擇路線時，既要考慮沿途風景好，唔好悶親人，又唔可以同現時某善團舉辦的單車籌款活動太相似，所以要再慢慢度橋。
咁阿Paul又會唔會搞個賽車籌款呢？佢話，以前的確試過喺珠海舉辦賽車籌款，但係啲戰車要由香港運上內地，手續繁複，使費又大，扣除開支後實際善款唔多，得個做字，所以後來就唔搞喇！不過，幾年前中港兩地開放香港車到內地自駕遊政策，啲車過關方便好多，日後或者可以諗吓喎！
蘇陳偉香練手語傳愛
當晚名流眾多，仁濟副主席嚴徐玉珊更全家總動員撐場，事關嚴家孻仔嚴子諭係海外學生會主席。仁濟主席蘇陳偉香（Susan）都現身招呼賓客，佢透露十一月初將舉行一場破健力士紀錄的「萬人手語傷健傳愛大行動」，屆時將招募一萬名義工齊做《獅子山下》手語歌，以宣揚傷健共融訊息。Susan笑言唔識手語，所以最近密密練兵，希望到時唔好失威咁話。
卓妮