今時今日，人人都有手提電話，個個都係神話故事中嘅千里眼及順風耳，不過咁，有利必有弊，手提電話為人類帶來方便嘅同時，亦帶來各種滋擾，尤其係直銷電話，簡直令人忍無可忍。
呢，個人資料私隱專員公署調查發現，超過九成受訪市民曾接過直銷電話，立即掛線比率由○八年嘅一成一增至兩成一，逾八成人認為直銷電話浪費佢哋嘅時間及帶來不便，更有九成九人指直銷電話構成滋擾，當中約六成人不滿致電者知道自己名字。私隱公署話喎，已將十八宗投訴轉介警方調查，結果多數因為證據不足或涉境外公司而無法檢控。公署再次促請港府修例，將真人直銷電話納入規管。
其實，直銷電話擾民已經唔係一朝一夕嘅事，港府一直闊佬懶理，導致情況愈來愈嚴重。唔講唔知，本港每月平均有一億次促銷電話，市民平均每年收到約一百五十次，都咪話唔誇張。淨係今年上半年咋，消委會就收到超過三百一十宗涉及直銷電話嘅投訴，較去年同期急增六成。試諗吓，當你正忙緊嘅時候，突然有直銷電話無厘頭問你使唔使借錢或者做唔做美容，你會有乜反應呢？唔嬲就假！
通訊事務管理局話就話○七年推出《非應邀電子訊息條例》，仲設立「拒收電子訊息登記冊」，規管錄音式推銷電話、短訊及傳真，可惜實施咗咁多年，市民仍飽受直銷電話嘅滋擾，證明相關條例完全係廢嘅。當局點解釋呢？佢哋話，真人直銷電話係中小企促進業務嘅主要途徑，而且提供唔少就業機會，應避免過分規管喎。簡直九唔搭八，錄音電話係滋擾，真人直銷電話同樣係滋擾，港府做啲唔做啲，拒絕將直銷電話納入規管，根本就係偏幫商界，無視公眾利益。
不可不知，直銷電話唔止造成滋擾，而且隨時成為消費陷阱o架。近年經常有市民投訴直銷電話冒認銀行推銷貸款，亦有市民受到直銷電話誘騙，喺「領獎」嘅時候被迫加入旅遊會籍或購買唔等使嘅產品，搞到大失預算。港府對呢類騙案視若無睹，同助紂為虐冇乜分別嘅咋。
講到底，市民有權保障自己私隱，亦有權決定接唔接收直銷電話，就算當局唔想一刀切禁止，最低限度都要設立登記制度，畀市民自己選擇啩。就好似美國一樣，任何人只要向商戶發出豁免信，就可以拒絕任何直銷滋擾，唔通港府連咁簡單嘅事都唔肯做？嗱，既然港產官僚咁鍾意聽電話，市民不妨齊齊向佢哋「直銷」，睇吓佢哋有乜反應！