政情：道盡徙置區 莊偉茵憶童年
中電企業發展總裁莊偉茵（Quince）前日以嘉賓身份出席一項喺二級歷史建築美荷樓舉辦嘅活動時，透露自己喺徙置區大廈住過。Quince話佢童年時每逢暑假，都會到外公同伯父居住嘅大坑東徙置區玩，有時仲會喺嗰度過夜，有幾樣嘢都令佢好難忘。第一樣係以金屬製造、夏天熱到可以用嚟煎蛋嘅滑梯，但佢當年都唔怕熱玩得好開心。第二樣就係由全層住戶共用嘅廁所，不但毫無私隱同陰森恐怖，仲聽聞曾經發生風化案，但好彩佢就冇遇過。
人情濃厚最難忘
不過Quince就，當中最令佢難忘嘅，喺徙置區內嘅融洽鄰里關係，大家守望相助，門不閉戶，每逢時節更會聚首一堂，分享美食。呢種咁濃厚嘅人情味，喺今時今日嘅香港已經唔多見。
Quince又話，當年佢家住九龍城舊唐樓，由於地方唔夠，於是加建咗一層「閣仔」。佢試過趁父母外出，匿喺「閣仔」點蠟燭玩燈籠，其後媽媽突然返家，佢慌張之下隨手拎起條毛氈遮蓋燈籠，結果即時着火！雖然最後冇引發火災，但係就換來媽媽施以「藤條炆豬肉」。