財政司司長曾俊華（鬍鬚曾）上周五突然要求各部門由一六/一七財政年度起，連續兩個年度每年節省百分之一開支，鬍鬚曾上周末從外地返港後「封嘴」，留待剛過去周日以網誌方式否認係「閂水喉」或削減開支，及至尋日出席公開場合活動，鬍鬚曾繼續「無話可說」，換言之，鬍鬚曾喺呢個重大政策轉變發生後，前後五日都無開金口講過一句半句。
鬍鬚曾尋日夥拍商務及經濟發展局局長蘇錦樑（Greg蘇）出席「Wi-Fi.HK」啟動禮，宣布即日起全港有共五千個免費Wi-Fi熱點畀市民上網，鬍鬚曾致詞時侃侃而談，提到香港嘅「網絡就緒指數」全球排名第八、亞洲第二，上網平均最高連線速度則全球排行第二。
不過，論「快閃」速度又點及鬍鬚曾，佢致詞完連合照後就一個箭步返入後台，離開傳媒嘅視線範圍，留低Greg蘇再拎住部手機硬銷Wi-Fi.HK。究竟幾時先係適當時候，喺鏡頭面前親口就削支政策解畫，呢個答案就留待鬍鬚曾自行去揭盅嘞。