政情：何俊賢胡志偉 睇好村屋後市?
本港樓價持續高企，早前細價樓仲出現小陽春，小市民想住大啲，但冇幾百萬喺手，新界村屋係其中一個選擇。立法會議員何俊賢（高佬賢）同胡志偉，就不約而同向村屋埋手，百幾二百萬就入到市，唔通佢哋都睇好村屋後市？高佬賢就強調，佢買村屋純粹係用嚟自住、貪個位置近媽媽，可以成日返去飲湯。胡志偉就話間村屋係太太買嚟收租，直言自己係投資盲，大家千祈唔好跟風。
之前一直冇自置物業嘅高佬賢，早前喺元朗橫洲買咗個村屋單位，啱啱上月底先至攞鎖匙，成功上車。佢透露，前年立法會選舉時，佢喺元朗市中心租咗個單位自己一個住，唔知業主係咪見佢當選咗做議員，去年要求加租，佢最後決定搬返屋企同媽媽一齊住。之不過，高佬賢一直都想有自己嘅私人空間，加上做咗議員呢兩年都叫收入穩定，所以就心思思想買樓自住。
「間村屋離市區遠」
喺街坊介紹之下，高佬賢最終睇中呢個約七百呎、賣二百多萬元嘅村屋地下單位，連畀地產經紀嘅錢都慳埋。高佬賢對新屋都好滿意，直言︰「咁嘅價錢買到咁嘅size，好合理啦！仲要唔使等升降機，慳番啲時間。」至於有冇升值潛力，佢就覺得間村屋離市區太遠，對市區人嚟講會有「心理障礙」，相信吸引力唔大。
我哋又發現，原來胡志偉太太前年都花咗一百五十萬元，喺西貢井欄樹附近買咗個頂層連天台嘅村屋單位。胡志偉表示，嗰時同太太行行吓街，太太見到間地產舖嘅街招介紹呢個村屋單位，覺得「幾OK」，於是就好似買衫買菜咁買咗番嚟收租。佢自言個單位用太太個名，由對方全盤打理，佢連間屋幾錢租一個月都唔知，亦唔清楚太太仲收埋幾多私己錢喎。
自住物業唔使申報
最近多名泛民議員被揭涉嫌漏報收受壹傳媒黎智英巨額捐款，我哋睇番高佬賢同胡志偉喺立法會嘅利益申報紀錄，都搵唔到呢兩間屋。高佬賢解釋，佢問過助理同秘書處，自住物業係唔使申報嘅。胡志偉方面亦指出，由於間屋佢本身無權處置，亦冇從中獲得金錢利益，所以同樣唔使申報。