中環出更：社運人高官放暑假 充電再搏殺
全國人大常委會本月底就政改訂立框架，各方人士都趁暑假離港充電，準備月底新一輪政改攻防戰，連社運人士都唔例外，據聞香港專上學生聯會多名現任同前任成員，包括現任正副秘書長周永康同岑敖暉，前秘書長陳倩瑩等人，上周末搞完灣仔警察總部集會後就齊齊去咗台灣，打算到台北、台中等地玩番幾日，難怪有人笑言學聯係「半真空」狀態，都唔知依家香港邊個先係正牌學聯發言人喎。至於佔領中環發起人之一戴耀廷，據聞近日都同屋企人去咗日本，稍事休息再搏殺過。
港府高官方面，據聞早前有人落柯打叫問責官員，呢段時間可以放假休息，不過最好喺本月中回港坐鎮，為月底嘅政改打仗做足準備，事有巧合，尋日特首辦公布特首梁振英（CY）今日開始離港休假五日，直至周日為止。
無獨有偶，商務及經濟發展局局長蘇錦樑（Greg蘇）亦喺同一段時間放假，不過佢同CY應該唔係去同一目的地，消息指Greg蘇會到內地做義工，之不過二人都會喺下周一返工，完全符合晒問責官員要月中歸隊嘅要求嘞！
卓妮