中環出更：特色創新 香港精神
工業化加上全球化，令好多生活產品都變得千篇一律，冇晒特色。踏入五周年嘅「香港精神」，今年就以「正在製造」為主題，表揚多個堅持產品要有個人特色同人情味嘅香港品牌故事。卓妮仲留意到活動召集人呂慶耀（Bryant）當日身上嘅恤衫設計非常獨特，原來佢一向對着衫好有要求，鍾意搵本地裁縫度身訂造，造造吓仲變成咗一種興趣添！
大家咪以為身材高大，一定着咩衫都好睇，Bryant就話有時反而會為佢帶來不便。好似買衫咁，佢經常遇到手袖或衫尾過短問題，有時坐低之後起番身，成件衫就會突咗出來，相當麻煩，與其買完件衫又要拎多次去改，就不如索性訂造。
呂慶耀愛訂造恤衫
Bryant又話自己好怕熱，千方百計想避免打呔，結果畀佢發現穿着有唐裝領口嘅恤衫，就可以解決呢個煩惱。其後佢又留意到喺恤衫上加上有軍裝元素及特別顏色嘅鈕門，成件衫就會變得好好睇，整整吓覺得訂造恤衫好有趣，變埋自己嘅嗜好。佢同太太結婚之前，對方亦知佢心意，送咗件特別訂造嘅恤衫畀佢。
本地著名裁縫品牌第二代張宗琪（Tony）及三代張奕庭（Justin）亦指出，本地裁縫師傅對完美細節嘅執着，係佢哋能夠成功衝出國際嘅重要元素。Tony話，有次佢見到個師傅望住件衫嘅腰間好耐，然後拆咗去再造過，竟然就係為咗裁走一條線咁幼嘅布出嚟，令佢非常佩服。
「產品特點 最有意義」
同場仲有不斷努力諗新招守業嘅紅Ａ第三代梁馨蘭（Jessica），以及新一代年輕創業者陳葆珊（Nicole）及陳耀浩（Elmo）等。其中Nicole無懼活版印刷行業式微，將刻板工序加入人性化及創作元素，成功吸納咗一批支持者，化身創意工業。而專幫客人設計及訂造結他嘅Elmo，就拒絕搵藝人為佢嘅品牌代言，佢過往喺非牟利團體打過工，深明比起賺錢，用家欣賞佢哋嘅產品特點，先至最有意義。
卓妮