公屋險飛窗 房署遲維修
單位鋁窗險「跌落街」，房屋署竟坐視不理！葵涌葵盛東邨有八旬獨居老婦日前發現廁所鋁窗鬆脫，老婦在千鈞一髮之際抓緊鋁窗，才免發生飛窗意外，但仍須呼救近一小時始獲街坊協助。老婦事後向房署查詢維修事宜，竟被指示致電長期無人接聽的電話，等候逾一周仍未獲更換鋁窗。區議員狠批房署不負責任，要求盡快為全邨檢查鋁窗，免生意外。
緊抓鋁窗近句鐘 街坊解救
「嗰日諗住開窗，點知一推上面個鉸就甩咗，成隻窗即刻向街跌，結果要掹住個窗成個鐘係咁叫救命！」現年八十二歲的林婆婆獨居於葵盛東邨盛強樓，婆婆憶述事發當日為免窗戶墮街誤傷途人，「搏晒老命」捉緊窗戶，求救近一小時始獲街坊發現，並代為通知房署，「我捉到對手都瘀晒，好彩個街坊幫手拉番隻窗上嚟先冇事，唔係我都捱唔住，一放手就跌落街，實砸死人啦！」
林婆婆續稱，房署職員事後接獲街坊通知始到場了解，但接着即「冇晒影」，「個職員叫我等電話，點知等咗成個禮拜都冇人嚟整！」鋁窗甩鉸後廁所失去窗戶，婆婆需以雜物遮擋，免單位受風吹雨打，極為不便，遂向大廈管理處查詢維修情況，對方僅提供聲稱屬維修部的電話號碼，着婆婆自行查詢，「點知打到去只係駁去留言信箱，仲要個信箱成日都爆晒！」
房署解釋缺組件 訂購需時
房署發言人解釋，事發當日保安員巡經盛強樓平台時，聽見有人高呼救命，隨即上樓視察，到達時已見有居民協助移走鬆脫的廁所窗戶，檢查後發現有關窗戶鉸位損壞而鬆脫。因訂購組件需時，未能即時進行維修，但日前已為住戶完成安裝新窗。發言人說，該邨於二月展開全方位維修計劃，至今曾接獲六十多戶盛強樓住戶要求檢查及維修窗戶，預計明年完成。至於有指維修部電話無人接聽，發言人未有回應。
「隻窗差啲飛落街，咁大件事房署都懶懶閒，仲要畀個冇人聽嘅電話叫長者自己打去問，真係太離譜！」一直跟進事件的當區區議員周偉雄狠斥房署不負責任，未有顧及居民安危。周曾代婆婆向管理處查詢，職員稱「出咗緊急Order畀維修部」，但一直未見上門維修，直至本報轉介後，翌日即為婆婆更換全屋鋁窗，「條邨做緊全方位維修，有乜理由會冇零件，根本就係唔搵傳媒投訴就唔做嘢！」周要求當局在風季來臨前為全邨住戶檢查窗戶，以免發生意外。
記者：詹海萍、攝影：徐少琴