內地黑心食品氾濫成災早就唔係新聞，至弊本港食安當局把關是是但但，得過且過，搞到香港次次遭受池魚之殃，「美食天堂」呢塊金字招牌風雨飄搖，好快改名做「毒食天堂」都得咯。
睇吓麥當勞過期肉醜聞愈鬧愈大就知嘞，麥記聲譽受損事小，當局把關不力，抽檢粗疏，無數消費者食毒落肚事大吖嘛。呢嗱，今次事件雖然係由上海率先爆發，但中招嘅唔止內地食肆，遠在日本嘅麥當勞亦不能幸免，香港背靠祖國，食品大多來源於內地，如果咁都可以獨善其身，講都冇人信嘞。
混帳嘅係，麥當勞死雞撐飯蓋，一開始死唔認數，食安中心亦幫腔，異口同聲話冇上海福喜食材入口本港，唔知嘅仲以為佢哋係麥記公關添。不過咁，真嘅假不了，假嘅真不了，有眼尖網民貼出麥當勞採用福喜食材嘅圖片，引起全港嘩然，麥當勞瞞無可瞞，賴無可賴，先至死死地氣承認曾進口上海福喜食材，而食安中心亦如夢初醒，事後孔明咁聲稱暫停所有福喜食品進口本港，直到調查有結果云云。
即係咁，如果唔係傳媒揭發，網民踢爆，麥當勞好可能繼續瞞天過海，食安中心亦繼續瞌眼瞓。食安中心同麥當勞本來係監管同被監管嘅關係，到頭來主僕顛倒，食安中心唔止要低聲下氣要求麥當勞主動提供訊息，仲畀對方指摘提前公布係違反誠信添，你話幾咁窩囊吖。正如「東方報業民意調查」顯示，三成九受訪者批評食安中心反應遲鈍，後知後覺；三成直斥無牙老虎，軟弱無能；兩成五批評效率太慢。
官老爺麻木不仁，助紂為虐，「民以食為天」咪淪為「民以食為憂」咯。最令人激氣嘅係，當紙包唔住火，當局唔係有法必執，違法必究，反而慈悲為懷，繼續為違規企業開脫，將責任歸咎於生肉及熟肉兩種唔同監察標準嘅制度漏洞，仲大言炎炎話歡迎大家提出意見檢討，你話係咪包庇吖！
無錯，目前熟肉入口制度有漏洞，畀黑心奸商有機可乘，的確需要檢討，但對於專鑽漏洞兼企圖隱瞞嘅無良企業，唔通唔使追究責任咩？如果其他企業有樣學樣，咁仲成世界嘅？上述民調又指出，食安中心作為食物安全第一道關卡，黑心食品竟然如入無人之境，五成直指應加強罰則，打擊不良食品；兩成三批評把關巡查被動，欠積極；兩成二批評無吸取教訓，黑心食物成災。
唉，現屆政府上台兩年幾，由民生到經濟冇瓣搞得掂，搞到民怨沸騰，不知反躬自省，樣樣歸咎他人，咁食品問題爆不停，唔通又係「拉布」所致，又入少數激進政客嘅數咩！