政情：轉戰金融 許漢忠過冷河？
機場管理局前行政總裁許漢忠（Stanley）七月正式離開機管局，佢任內爆出更改機場商舖投標條件風波，一度被質疑涉利益輸送，不過都無阻礙Stanley離開機管局後嘅新發展。據聞佢離任後不足一個月時間，就轉投兄長嘅金融公司做顧問，似乎想喺航空業以外殺出一條血路喎！
加入胞兄公司
有商界消息指，Stanley最近加入六福金融做顧問，同一時間總商會網頁亦顯示，Stanley嘅履歷上工作一欄，係填上「Luk Fook Financial Services Consultant」，顯示佢已經全程投入新工作。資料顯示，六福金融主席係許照中，其實許照中係Stanley嘅哥哥，似乎佢哋想拍住上喎。
Stanley由航空界轉投金融業，有商界人士分析，Stanley本身同商界唔錯，加上有排未到退休年齡，估計新工只係過吓冷河，有人更預告分分鐘稍後會見Stanley重返航空界。究竟Stanley會選擇重返老本行，定係另闢事業新天地，好快自有分曉！