新一屆區議會明年底上演，選舉管理委員會早前公布區議會選舉選區劃界建議，其中西貢區議員方國珊（哪吒）原有嘅環保選區，有機會被一分為二，改劃為環保北同環保南兩個選區。雖則呢個建議依家仲未最後敲定，但建制派明顯唔想哪吒繼續喺將軍澳勢力坐大，決定聯手左右夾擊哪吒，等佢去邊區都自動當選無望。
建制派消息指，哪吒雖仍未決定落戶環保北定環保南，但民建聯同自由黨提早派出社區主任密密落區做嘢，前者就派出立法會議員葛珮帆助理胡綽謙，後者就派出哪吒前助理崔定邦，講到底都係唔想哪吒「得一想二」，既可順利連任，甚至帶埋新人進身區議會。
哪吒接受查詢時承認都幾擔心明年嘅區會選情，認為兩黨派人出選佢嘅選區，好明顯係針對佢而來。哪吒想全取兩席，似乎要奇招制勝至得嘞！