政情：立會心思思 學政總落閘

玻璃外牆加鐵馬難抵禦

添馬艦政總同立法會大樓當年設計時以開放為特點，因此喺外牆選用大量玻璃，原本一直相安無事。不過喺五、六月財務委員會審議新界東北發展前期工程撥款申請時，有反新界東北發展示威者趁亂衝入大樓地下示威，其後更有示威者手持硬物企圖突破保安防線衝入大樓，令多處大樓外牆同玻璃受到破壞。唔好以為凡此種種無反效果，首先行政署趁機拍板封閉公民廣場加設圍欄，加上本身有事可以隨時「落閘」，兩大措施即時大大提升政總嘅安全系數。

有政總呢個隨時「落閘」同加設圍欄決定在前，有行管會成員憶述反新界東北示威者當時衝擊大樓時，雖然有鐵馬隔開示威者，但由於立法會大樓太多玻璃，加上玻璃同鐵馬之間無其他物件阻隔，令示威者一眼就睇晒成個大樓內部，不但連警方部署睇得一清二楚，立會保安亦只可以用「人肉盾牌」擋住啲示威者。所以為咗治標又治本，有人建議秘書處效法行政署喺玻璃外牆加設鐵閘，等第時遇有示威者入侵就即時「落閘」，就算頂唔到一世都頂得住一時喎。

有人提出建議就要檢視吓係咪可行。有立法會秘書處中人話，鐵閘其實有多項功能，除咗可以作為屏障擋住對付示威者，而且有其實際用途，舉例指平日可以將鐵閘捲起，一旦假日或者打風時就可以「落閘」，費事啲玻璃被吹爛而發生意外。

費事畀人話有既定立場

不過有心水清嘅人提醒，立法會早前委託顧問公司檢討大樓保安嘅報告一日未完成，秘書處都唔會輕舉妄動，費事畀人話有既定立場。究竟立法會「落閘」建議會否成行，相信唔使好耐就會有答案嘞！