中環出更：政改關鍵時刻 樹根訪加
全國人大常委會本月底會就政改訂立框架，建制派立法會議員鍾樹根喺政改關鍵時刻前夕竟然去咗加拿大，莫非係去勾結外國勢力？非也，其實樹根只係去咗加拿大白馬市（White Horse City）旅行，順道拜訪當地議會，獲同姓三分親嘅前市長鍾富喜接待。
樹根喺社交網站話，鍾富喜曾任四屆市長，見到佢今次遠道由香港而嚟，於是陪同參觀議會，又向佢解說白馬市歷史同當地風俗，感到樂而忘返喎。
俄多內地客 黃碧雲感慨
另一邊廂，泛民主派議員黃碧雲（Helena）同老公就選擇去俄羅斯莫斯科旅行，二人先參觀當地有名嘅莫斯科紅場同克里姆林宮，再去參觀保存多年嘅列寧遺體同史太林墓碑。Helena話旅行期間遇到唔少內地旅客，當中有唔少都係個人遊遊客，感慨中國經濟發展令唔少內地人愈來愈富有。Helena同老公其後搭通宵火車去聖彼得堡繼續行程，似乎係想充足電，迎接即將出爐嘅人大政改決定嘞。
卓妮