中環出更：七夕搞婚宴展 何國鉦送祝福
前日係七夕，本地著名時裝設計師何國鉦（Dorian）亦趁住呢個咁浪漫嘅日子，與一間酒店合辦晚宴並為婚宴展覽揭開序幕，好多名人好友都來撐場。立法會紡織及製衣界議員鍾國斌（Felix）為咗切合大會「五十年代服飾」嘅主題，上網鑽研咗好耐，得出結論係男士無論五十年代抑或現今都係鍾意着西裝，所以冇乜分別喎！主人家Dorian就藉住展出一系列女士夢寐以求嘅婚紗，祝福單身人士快啲搵到伴侶，結咗婚嘅就珍惜眼前人喎！
呢日以彩色波點恤衫現身嘅Felix，雖然認為男士咩年代都係着西裝居多，但身為「水怪」嘅佢，顯然深明身形夠弗就着咩都好睇嘅道理，所以除咗游過渡海泳之外，佢仲長期運動以保持體態。而佢同Dorian則分屬世交，事關上一代都係從事製衣業，Felix更大讚好友腦筋靈活，由市場策劃到轉型做設計都一樣咁成功，自己亦感光榮。
戴凱欣憶九霄驚魂
同場仲有四洲集團太子女戴凱欣（Kennis）、中華國術（香港）總會會長王嘉恩及莎莎太子女郭詩慧同型仔老公陳振邦。一身粉紅Pink Lady造型嘅Kennis，本來計劃月中到台灣旅遊減減壓，但發生高雄大爆炸事件，加上近月工作及喜慶活動均非常頻繁，所以要重新考慮。
Kennis又話，近月數宗空難事件，令佢回憶起過往一次驚嚇旅程。有次佢因機位問題，臨時改乘馬航由香港前往吉隆坡，途中客機在空中顛簸不定，其後轉乘內陸航班往檳城時，更因機件故障，於冇燈冇冷氣情況下被困機內一小時，幸最終平安到埗，但就嚇到佢以後就算免費都唔坐，冇位情願取消旅程。
卓妮