開講有話，良禽擇木而棲。道理好簡單，人才梗係選擇最有發揮空間嘅地方，咁先至可以大展拳腳吖嘛，所以話，如果一個地方吸引唔到人才，又或者人才唔肯留低，唔使問阿貴，呢個地方一定有問題。
呢，為吸引人才來港發展，港府○三年推出輸入內地人才計劃，可惜效果麻麻地。舊年十月至今年三月底，該計劃只批准四千二百幾人嚟香港，比之前半年下跌百分之七，而且當中超過六成係為期不足十二個月嘅短期職位，其中最多獲批來港個案嘅藝術同文化界別，短期職位更加超過九成九，同計劃原意有好大出入。
點解藝術人才唔留喺香港長期發展，而當香港只係短暫停留之地？業界人士係咁講嘅，好多藝團獲聘來港表演，通常都係一個班底，有時只係演出幾日，所以短期職位居多，相反藝術院校一、兩年合約嘅駐院表演職位比較少。其實，計功夫茶話齋，除咗上述原因之外，香港出咗名係文化沙漠，藝術人才就算想留港發展，都未必有機會，亦未必有人識欣賞喇。
講嚟講去，都係因為香港經濟結構單調，獨沽金融地產，咪講話藝術人才冇發揮空間，其他人才一樣冇用武之地。回歸後港府計劃多多，一時話建設乜港物港，一時話發展優勢產業，一時又話將產業「做多做闊」，可惜講就有力，做就無能，咁多年來，香港經濟轉嚟轉去都唔成功，可以吸引到人才至奇吖。話時話，除咗輸入內地人才計劃失敗，輸入優才等計劃推行多年同樣唔理想，每年成功批出個案唔夠目標一半，只係淪為內地名人同明星出國嘅跳板咋。
正所謂，三軍未動，糧草先行，香港衣食住行樣樣貴，生活成本愈來愈高，人才想喺香港落地生根都要諗過度過先啦。呢，早排一項針對各地外籍人士嘅調查發現，香港生活成本指數高踞全球第三，跑贏東京、倫敦、紐約等大城市。加上香港社會愈嚟愈政治化，嘈喧巴閉，永無寧日，唔少本地優秀人才都移民他國喇，遑論吸引境外人才。
此地不留人，自有留人處，人才永遠都係跟住機會走。好似新加坡咁吖，過去十年吸納咗超過一百萬名新移民，當中大部分係教育程度較高嘅專業人士，除咗因為政府提供稅務同住屋等優惠，講到底都係因為當地發展機會同空間比較大。
都係嗰句啦，廿一世紀最寶貴嘅係人才，香港發展機會少，生活成本高，社會爭拗多，空氣質素差，唔好話招才啦，趕才就差唔多，再咁落去，香港遲早變番小漁村嘅咋！