政情：八網難逃：慢必寸人「袋住先好麻煩」

壹傳媒黎智英（肥佬黎）喺去年十月同今年四月，先後向工黨主席李卓人（阿人）捐款五十萬同一百萬元，原意係畀工黨營辦社企同準備明年嘅區議會選舉，但阿人將該兩筆捐款放咗喺佢個人銀行戶口長達個多月至九個月，直到最近獻金醜聞曝光，佢先至急急將呢兩筆巨款轉帳番落工黨戶口。人民力量立法會議員「慢必」陳志全前晚就喺社交網站，引述「on.cc東網」嘅即時新聞報道，留言指「李卓人用親身經驗告訴大家，『袋住先』會好麻煩」，一語雙關寸盡阿人同政改三人組嘅「袋住先」理論。人力係少數冇收過肥佬黎捐款嘅泛民政團，慢必寸人自然寸得口響啲。