政情：梁美芬反佔中 暗批八九民運
立法會議員梁美芬反對佔領中環，話佔中運動癱瘓交通，仲話親身有過「被癱瘓」嘅經歷，認為呢種做法係不負責任同自私。原來佢嘅親身經歷係八九民運，莫非佢想暗示留守天安門嘅民運人士癱瘓交通，係不負責任同自私？為咗反佔中，佢都去到好盡喎。
斥癱瘓交通者自私
梁美芬上個月向政府「獻計」，建議招募志願軍對付佔領中環行動，尋日佢又去到長沙灣蔬菜統營處批發市場，撐業界反佔中。佢大大聲話佔中會癱瘓交通，影響業界飯碗，又話自己喺外地都親身經歷過因政治活動癱瘓交通嘅情況，搞到佢要兜路行成幾個鐘，大鬧咁嘅爭取模式係不負責任同自私，長遠更加會令市民吸納破壞同搗亂嘅文化，絕對係深層次嘅破壞喎。
事後佢至講，原來佢個親身經歷就係八九民運嗰時，因為民運人士佔據天安門廣場，搞到佢要由中國人民大學徒步行去天安門。睇番地圖，又真係要行成兩個幾鐘頭嘅。不過佢用貶低八九民運嘅方法嚟講解反對佔中，唔知會唔會弄巧反拙呢？