政情：彪升收租佬 急申報避嫌
壹傳媒黎智英被揭向多個泛民政團同人士秘密捐款後，一眾立法會議員，不論係泛民主派定係建制派，亦不論有冇收過肥佬黎錢，都變晒做「驚弓之鳥」，嗱嗱臨向立法會補鑊申報過往涉嫌漏報嘅捐款及其他個人利益，有部分議員更加係「唔怕一萬、至怕萬一」，有理冇理、乜嘢雞毛蒜皮都報咗先。其中工聯會議員鄧家彪（Bill）就喺上月底、亦即政治獻金醜聞曝光後兩日，向立法會更新申報資料，將自己喺新界區擁有嘅物業，刪除咗「自住」兩個字，疑似「升呢」咗做收租佬。
房屋開支大 形容「窮爆」
Bill向我哋講，其實呢個係「美麗的誤會」，實情係佢位於新達廣場嘅自置五百呎單位，去年底發現地板滲水谷起，為免整親佢囡囡，佢一家三口惟有被迫暫時租住同區另一個單位，騰空原有單位進行大裝修。點知佢住住吓「貪新忘舊」，皆因新屋足足有成九百呎，大過舊單位八成。雖然新屋冇咁近港鐵站，但地方大咗，密度又低啲，最後就索性將舊單位放租，同佢睇唔睇好後市絕對無關。舊單位最近已成功租出，因為涉及金錢利益，所以咪要更新申報資料囉。
Bill形容自己係一位「窮爆」嘅收租佬，一來層舊樓仲要供足二十年，二來間新屋大過舊屋咁多，每月單計租金已要畀多四千幾銀，而且一闊三大，新屋乜嘢開支都多好多，估計要捱到個女出身搵嘢做，先可以再諗買過層大啲嘅樓。新屋大咗咁多，有冇考慮追多個呀？Bill笑言未有打算住，暫時將新屋多咗間房當作書房用喎。
莫乃光申報收受《基本法》
其他議員近期嘅新申報有啲都好趣怪，好似資訊科技界嘅莫乃光（Charles），就申報喺今年四月立法會出訪上海時，收咗港澳辦主任王光亞贈送嘅一本《基本法》，價值廿二元人民幣。但其他同樣有獲王光亞贈送《基本法》嘅議員，就冇主動申報，唔知係呢班議員涉嫌漏報利益，定係Charles太敏感搵嘢嚟搞呢？
民主黨單仲偕就申報喺七月八至十日，獲「腓特烈．瑙曼基金會」邀請出訪雅加達，出席亞洲自由民主議會會議，由對方提供機票住宿。至於紡織及製衣界鍾國斌，申報喺今年六月二十日開始，出任恒寶企業控股有限公司嘅非執董。本身係基督徒嘅獨立泛民議員黃毓民，就申報喺今年五月廿六日，獲「國際釋迦文化中心」贊助一萬三千二百元舉辦長者活動。