中環出更：辭任兩銀行董事 張建東「裸退」
行政會議前成員張建東（Marvin），早前突然辭任機場管理局主席一職，之後嘅接任安排又相當奇特，先由原機管局董事羅康瑞暫代主席一年，之後再與現任貿易發展局主席蘇澤光互相交換職位，當時有傳言係同Marvin與羅康瑞就機場北用地發展用途爆發爭拗有關。不過，張建東尋日一次過再辭任滙豐銀行同恒生銀行嘅董事職務，在政商界接近「裸退」，睇嚟真係同佢嘅個人健康有關，希望佢好好休養吓，盡快回復健康，「東」山復出喇！
滙豐銀行尋日發出通知，指張建東已辭職獨立非執董及集團監察委員會成員職務。同系嘅恒生銀行亦於同日宣布，張建東已辭任立非執董職務，兩者都係即時生效。Marvin加盟恒生董事會已有十年，之後仲做埋審核委員會委員及風險委員會主席，地位吃重，恒生尋日就喺通告中感謝佢嘅英明指導，祝願佢往後事事順利。滙豐集團主席范智廉亦喺通告中，對○九年起擔任滙豐非執董嘅Marvin辭任深感惋惜。
資料顯示，Marvin曾於○六年患上急性血癌，去年又傳佢接受過髖關節置換手術，之後要篤住拐杖行路。不過就唔知佢今次「裸退」，到底係涉及乜嘢健康問題喇。
卓妮