中環出更：實習生體驗 立會多事之夏
立法會秘書處早前舉辦第二屆「專上學生2014年度實習計劃」，一共有十九名學士及副學士學生參加。喺為期三至四周嘅實習期內，同學們除咗被派往秘書處各部門，體驗秘書處日常工作外，仲有機會參與立法會大小會議，與各黨派議員面對面交流。適逢今年六、七月正值立法會「多事之夏」，拉布、流會、掟嘢、暴力衝擊同集體衝出座位等議會亂象沒完沒了，令一眾實習生大開眼界，激讚實習計劃令佢哋見識到立法會同一眾議員鮮為人知嘅一面，認真係獲益良多！
卓妮尋日約咗立法會秘書長陳維安同其中十位立會實習生傾偈，就讀恒生管理學院嘅Jason喺議會事務部（3）實習，有機會親身進入會議廳，見證議員開會嘅眾生相，包括負責喺議員要求響鐘時，幫手「剔名」點算法定人數。Jason話有啲議員喺響鐘期間都不斷行出行入，搞到佢數極都數唔清楚，幸好喺佢「任內」未試過因法定人數不足而流會，算係好腳頭。
來自教育學院嘅Fiona就喺翻譯部工作，負責將議員發言翻譯做英文文本，撞啱激進泛民發動多線拉布戰，令佢同其他翻譯組同事有大把發言翻譯，忙到無停手。Fiona話班拉布議員嘅發言大部分都言之有物，令佢識多咗唔少社會議題，返工一啲都唔覺得悶。
難忘與議員暢談
同樣來自教院嘅Regine就話，整個計劃最難忘嘅係「與立法會主席及議員暢談」，因為有機會直接與不同黨派嘅議員溝通交流。Regine透露，立法會主席曾鈺成曾經質疑佢哋啲問題好無聊，不過佢哋都讚曾鈺成為人隨和，唔似鏡頭前見到咁有威嚴。
陳維安就話，初時都有擔心實習生難以喺短時間內融入秘書處生活，又驚會加重其他同事負擔，幸好今屆實習生遠比佢想像中活潑同熱情，來年佢會考慮延長實習期同畀啲同學仔更多部門做嘢，等佢哋有更多得着。
卓妮