反腐潮流浩浩蕩蕩，沛然莫之能禦，內地官場大老虎終於落網嘞。中共前政治局常委、中央政法委前書記周永康因為涉嫌嚴重違紀，被中紀委立案調查，消息震驚海內外，為神州反貪掀起高潮，亦為全國貪官敲響喪鐘。最諷刺嘅係，腐敗神州鐵腕反腐，老虎、蒼蠅一齊打，反而號稱廉潔城市嘅香港放軟手腳，任由貪官污吏逍遙法外，睇怕香港嘅法治與廉政招牌都好快摺得咯。
功夫茶唔係亂講，前特首曾蔭權爵士同前廉政專員湯顯明被稱為「絕代雙貪」，喺香江官場貪名狼藉，臭名遠播，但係查嚟查去，至今仲未落鑊，真係奇哉怪也。唔理廉署係查案不力，定係蓄意放生，都直接衝擊本港嘅法治與廉政基石。就講貪曾吖，東方報業集團喺前年二月獨家踢爆佢嘅連串貪腐醜聞，揭發佢同富豪勾肩搭背，利益輸送，無法無天，當時廉署聲稱開快勞調查，點知查到家陣都未見下文，三十個月嘞，案件依然如泥牛入海，無影無蹤。至於貪湯咯喎，一樣係本港廉潔嘅災難，身為廉政專員居然不廉不正，唔止返工做醉貓，仲要違規亂開單、送禮換政協，引來全城嘩然，廉署舊年五月又係話展開調查，結果又係軟手軟腳，查到依家連影都冇。
正所謂，唔怕唔識貨，最怕貨比貨。內地官場貪風盛行，今日都夠膽對周永康呢類大老虎開刀，香港以廉潔城市自居，反而唔敢將絕代雙貪呢兩隻貪腐老鼠落鑊，講出嚟都丟架喇。嗱，廉署如果繼續執法不力，任由貪曾、貪湯逍遙法外，等如向全世界證明，香港反貪連內地都不如，「一國兩制」係咪得啖笑吖。
講起都唔知可悲定可笑，周永康集團勢力龐大，盤根錯節，中央連根拔起都只係前後用咗兩年時間，而廉署查絕代雙貪呢兩隻老鼠，兩年幾來居然無聲無息，唔通貪曾、貪湯嘅貪腐問題比周老虎更加複雜？定係當局有不可告人嘅苦衷？正如有學者話齋，廉署查雙貪進度緩慢，或者有政治考慮，不過功夫茶想提醒當局，法治與廉政係本港嘅核心價值，絕對不容玷污與破壞，廉署必須盡快公布調查進度，直至將貪官法辦，畀市民一個交代！
計功夫茶話齋，北大人想擺平香港亂局，發表政改白皮書係冇用嘅，應該發表反貪白皮書，表明反腐不容「一國兩制」，中央打大老虎，香港亦要打大老鼠。如果絕代雙貪一網成擒，港人睇到當局反腐決心咯，隨時怨氣都少啲喇，係咪？
一句講晒，中央鐵腕打老虎，香港縱貪護老鼠。家陣連內地都無「刑不上常委」呢支歌仔唱，香港更加無理由搞「刑不上特首」、「刑不上專員」，現屆政府如果真係想「適度有為」，唔該盡快將貪官繩之以法，唔好一拖再拖嘞！