五名泛民主派議員被揭發收受壹傳媒老闆肥佬黎捐款，但被指冇申報。本來工聯會欲搶飲頭啖湯率先聯署去信立法會議員個人利益監察委員會要求跟進，聯署人之一嘅議員王國興仲喺尋日朝早叫委員會公平公正處理佢哋嘅投訴，點知佢哋似乎「唔熟書」搞到甩晒轆，事關佢哋封信竟然冇寫明邊個議員涉嫌違規，根據《議事規則》係不予受理。好彩最終有十二封電郵具名投訴，委員會先至受理，否則放生咗五個涉嫌漏報利益嘅議員，真係唔知佢哋點向市民交代喇！
