政情：拍枱整傷手 慢必要針灸

做健身發力即痛

不過，「拉布」都要付出代價，好似人民力量陳志全（慢必）繼「拉布」出現坐骨神經痛，要去搵人推拿按摩後，佢嘅右手又因為喺財務委員會審議新界東北發展前期工程撥款時「拍枱」而不慎整傷，要去港大中醫藥學院做針灸紓緩痛楚。

慢必話，自從上月「拍枱」之後，佢隻右手就開始出現問題，之後去健身一發力都會覺得痛。初時佢都唔為意，但點知近日情況愈來愈嚴重，連拎重嘢都會覺得痛，於是佢尋日去咗港大中醫藥學院中區臨床教研中心睇中醫，仲順便做埋針灸治療。不過，佢話第一次做針灸無乜特別感覺，要做多兩至三次先會有顯著成效，又話以後都唔會用手拍枱，會改用其他物件拍枱，確保唔會再次因工受傷喎。