政情：星爺挑機卿姐撳住砌
立法會財務委員會主席吳亮星（星爺）處理新界東北新發展區前期撥款「一戰成名」，闊別個幾月，星爺尋日終於拉埋財委會副主席劉慧卿召開年結記者會，總結財委會過去一年嘅工作。不過，星爺粗暴通過新界東北撥款呢筆帳，包括卿姐在內嘅泛民主派一直記到實，二人喺記者會重逢可謂火花四濺，先有星爺暗諷泛民「無事生非」，後有卿姐全程「單打」星爺，兼駁斥對方「面係人哋畀、架係自己丟」，二人對戰好睇過做戲。
星爺「無怨無悔」 自評合格
財委會年結記者會，星爺嘅表現自然係眾人嘅焦點，佢自稱唔算係「新人」，但第一次「坐正」財委會主席就處理咁具爭議性嘅撥款項目，表現一定有改善空間。不過，面對泛民以至部分市民嘅圍攻，佢依然自信心爆棚，自評表現合格，有六十至八十分！星爺仲相當豁達話，擔任得公職就「食得鹹魚抵得渴」，由始至終都係憑良心做事，絕對「無怨無悔」，冇理由「人哋話你兩句就唔做，好似小朋友咁」喎！
不過，星爺其後都抵唔住頸，開聲批評泛民攞佢申報啲嘢嚟話佢做主席有利益衝突，形容泛民下下提不信任動議係「無事生非」，星爺咁講擺明撩交嗌喎。坐喺隔籬嘅卿姐隨即動氣反駁，指泛民提不信任動議係有理據嘅，叫星爺要先反省，仲當面斥星爺「面係人哋畀、架係自己丟」，事件令財委會面目無光，星爺作為主席就唔應該猛同議員駁嘴，亦不應推測議員嘅發言動機，應該忍讓吓囉！
二人勉強合照 「一拍兩散」
卿姐仲「提醒」星爺，若果再遇到議員「挑機」，大可退落嚟搵其他人頂替主席一職，或交由委員會投票決定。最後記者會未正式完結，二人勉強合照後隨即一個向左走、一個向右走，一拍兩散。雖然星爺已表明下個會期唔會競逐連任主席，但盛傳接任人選係「舊人」飲食界張宇人，望就望張宇人接過呢個燙手山芋醒醒定定喇！