中環出更：小肥張物業投資？ 「太太話事」
近日港股連創新高，唔少人都賺到笑呵呵。尋日金銀業貿易場慈善基金舉行一連串慈善活動嘅啟動禮，卓妮見到有「樓王」之稱嘅勞工及福利局局長張建宗（小肥張），梗係要問吓佢嘅投資心得啦！點知小肥張竟然話，唔可以話佢好鍾意投資物業，事關除咗個中西區個自住單位外，其他八個物業都係由太太名下持有，三言兩語之間，就將投資問題推晒畀太太，只係肯講自己長期睇好香港投資前景。
雖然話所有物業都係太太名下持有，但講到尾，一個家庭主婦要投資咁多物業都要有丈夫嘅支持，但小肥張冇直接回應呢個問題。不過，對於政府並無要求官員披露配偶嘅資產，佢就話自己申報埋太太持有嘅物業可以提高透明度。咁除咗物業仲有冇其他證券等投資？咁多年來又係咪只買入唔賣出所持有物業等問題，佢就話全部都係由太太揸主意喇，仲自稱同太太只係小業主嚟喎！
稱與吳得掂係「金銀」
講番個啟動禮，小肥張在致詞時講笑話，佢同另一嘉賓教育局局長吳克儉（吳得掂），一個係金一個係銀，即係兩個都咁重要。又笑笑口話吳得掂好有錢，因為政府如果每日使一百元，有二十一元係畀咗吳得掂，十八個半畀佢，十七元係畀食物及衞生局局長高永文，意思指政府重視民生，使超過一半錢喺教育、勞福及醫療上。
至於作為主人家嘅金銀業貿易場慈善基金主席張德熙，就睇好未來第三、四季證券市場會繼續做好，佢話受美股及房地產帶動，令港股向好，預計恒指今年有望去到二萬七千點水平。
卓妮