「各位觀眾，又到咗港鐵報告時間嘞。由於過去一個星期，觀塘線、港島線、東涌線、將軍澳線、迪士尼線、輕鐵線、東鐵線同西鐵線都壞勻晒，所以明日好大機會輪到荃灣線同機場快綫出事，大家返工返學如果唔想遲到，就要自己執生嘞。」嗱，咪以為以上情節純屬天馬行空吖，港鐵事故無日無之，平常到好似日出日落、陰晴冷熱一樣，如果市民可以預知事故，趨吉避凶，就唔使搞到七國咁亂、民怨載道喇。
呢嗱，話口未完，港鐵又嚟料嘞。話說尋日朝早六點左右，金鐘站至尖沙咀站之間出現訊號故障，荃灣線全線列車服務大受影響，事件擾攘兩個多小時，撞正上班繁忙時段，玩殘打工一族。有乘客因為收聽到列車延誤消息而被迫提早出門，批評港鐵「近排服務好差」；亦有乘客入咗閘至知服務延誤，焗做月台沙甸魚，炮轟港鐵加價後反而經常壞車。
火滾嘅唔止荃灣線乘客。輕鐵麒麟站路軌同路面懷疑受附近水務工程影響而損毀，一條行車路線受影響，而車站二號月台仲一度需要關閉添，可謂屋漏偏逢連夜雨，禍不單行。其實，就算唔計輕鐵呢單事故，港鐵喺過去八日，已經先後五度訊號故障，兩次壞車，列車出事頻密過哈密瓜，你都咪話唔得人驚。前食衞局局長周一嶽無能無德，施政撞板多過食飯，所以被封「周一鑊」，睇嚟港鐵亦不遑多讓，堪稱「周七鑊」，日日新鮮日日甘，問你服未。
港鐵事故周而復始，而港鐵管理層又束手無策，唔通市民真係無辦法擺脫噩夢？其實，辦法唔係無，只係唔知港府夠唔夠承擔啫，正如有立法會議員話齋，只要當局肯負起責任，全面調查港鐵行車系統，咪有機會查出問題，揪出禍源，令列車服務重回正軌囉。嗱，要求港府出手唔係無的放矢o架，港鐵列車八日七故障，呢種不尋常嘅現象，隨時係出大事前嘅先兆，如果港府闊佬懶理，釀成巨禍，呢隻鑊無人孭得起o架。運輸官僚雖然慣於受港鐵蒙騙，不過都應該知道鐵路運輸係本港交通主命脈，亦係數以百萬市民每日嘅代步工具，人命攸關，牽連重大，千祈唔好當玩吖。
講真，有果必有因。列車就好似人體一樣，頻頻出事，周身唔妥，唔使問阿貴，一定係內部機能出咗問題喇。港鐵列車服役幾十年，正所謂年紀大，機器壞，你話無問題先至令人難以置信。至於港鐵接連跪低，究竟係機件老化、系統過時、維修粗疏定操作出錯，咁就要查過至知嘞。所以話，港府介入調查，港鐵應該無任歡迎至啱，如果查出禍源，可以避過一劫，如果查過證實無問題咯，咪當還自己一個清白囉，何必永遠背住一個自己查自己嘅污名呢，係咪？
一句講晒，市民對港鐵事故已經忍無可忍，港府製作「港鐵報告」就話有難度啫，如果連調查事故都懶做，咁就比港鐵更混帳吖！