「港仍受廣東污濁空氣影響」
林超英尋日喺佢最新一篇網誌，大讚維港對岸樓宇輪廓清晰，感覺有如睇緊高清電視。佢仲專登望過人造衞星圖片，望到香港同廣東東部地區喺海洋空氣覆蓋下，尋日視野良好，景物清晰可見，但係澳門至廣州嘅珠三角地區，卻被一重輕紗罩住，因而睇唔清地面情況。佢慨嘆雖然香港工業經已北移，但不時仍受到由廣東省吹落嚟嘅污濁空氣影響，視線通透唔係理所當然，市民應為香港可以享受到來自海洋嘅清新空氣而感恩。
講開粵港空氣質素，港府咁啱喺尋日宣布，環境局局長黃錦星今日會率團前赴廣州，同廣東省代表共同主持關於粵港應對氣候變化嘅會議。唔知林超英呢篇文章，係咪有意寫畀黃錦星睇嘅呢？