政情：細妹突提前退休 貪曾要搵竇？
「貪曾」前特首曾蔭權爵士被揭貪盡海陸空，歎盡省港澳，有傳將隨時「落鑊」，之不過仲係只聞樓梯聲響，相反「貪曾」細妹、渣打銀行大中華區主席曾璟璇搶先一步，突然宣布於八月一日提前退休，結束服務渣打廿二年生涯，理由係「以追求其個人新挑戰」喎！
稱追求新挑戰
渣打尋日發出新聞稿，宣布曾璟璇將於八月一日提前退休，理由係追求個人新挑戰，之後由渣打高層感謝對方多年來貢獻，祝願佢喺人生新一頁一切順利。翻查資料，曾璟璇現年五十七歲，未到一般退休年齡六十歲，加上新聞稿指曾璟璇提前退休理由係追求個人新挑戰，不過關於乜挑戰就無再解釋，真係認真耐人尋味喎。
講開曾璟璇，不得不提當年貪曾卸任後無大屋住，一度寄居於曾璟璇位淺水灣道嘅大宅，依家連細妹都決定提早退休，唔知貪曾有無需要搵個新瓦遮頭呢？