特首梁振英早前上深圳見完全國人大委員長張德江後，承諾安排香港泛民主派與中央官員會面傾政改，當時講到實牙實齒、一定會成事咁，搞到班泛民鬼咁興奮。但事隔唔夠兩日，又有人出嚟大吹淡風，話會面唔能夠一廂情願同有前設。有具份量嘅親中人士就話，底因係泛民喺之前嘅溝通同會面中屢次玩嘢同放飛機，令中央官員心中有氣。
呢位親中人士用英文諺語講，「It takes two to tango（跳探戈要兩個人先跳得成）」，中央及特區政府今年四月安排全體議員訪問上海，會見港澳辦主任王光亞同中聯辦主任張曉明等，有近一半泛民議員唔肯去，亦有人去上海又掉頭走，玩殘負責安排會面嘅官員。之後張曉明要約泛民議員喺香港見面，班泛民一時又話唔入中聯辦，一時又指喺六二二佔中公投前見面唔方便，其後中聯辦「移磡就船」就晒佢哋，泛民又以中央發表「一國兩制」白皮書破壞溝通氣氛為由放飛機，令中方冇晒面，感覺變咗「香港指揮北京」咁。
到底今次泛民與中央官員會面最後見唔見得成，以及可以見到乜嘢級數嘅官員，該名親中人士話仲有變數，最壞情況係要等到人大常委會八月底就特首普選作出原則性決定後，基本法委員會主任李飛等京官南下香港解畫時，先至「順便」見吓班泛民，同泛民要求喺人大拍板前會面有好大距離。