政情：學民升呢 明搶學聯客
學民思潮（學民）前年暑假因反國教一炮而紅，自此吸納大批中學生為骨幹，其中核心人物黃之鋒同周庭今年考完中學文憑試，如無意外會脫離中學行列升讀大學或大專院校，而學民同一時間計劃招募新血並向大專生埋手，似乎有同代表大專生嘅專上學生聯會（學聯）搶客之嫌。話時話學民仔同學聯之前因意見不合傳出內訌，依家又有學民轉型搶飯碗疑雲，睇怕未來雙方嘅明爭暗鬥只會有增無減。
周庭盼吸納大專生
仲等緊大學聯招放榜嘅黃之鋒同周庭尋日一齊出席電台節目，黃之鋒首先從個人出發，自言即使唔再係中學生，但暫時冇打算離開學民，如果升到入大學亦都冇打算選學生會或上莊。周庭則首次透露學民「升呢」大計，話學民未來會招募新血，除咗招收中學生成員，亦希望可以吸納大專生，又形容「學民思潮係學生組織，唔係中學生組織」。
有心水清嘅人話，學民「升呢」吸納大專生，首當其衝就係打正旗號代表大專生嘅學聯，事關佢哋成員以各大學學生會幹事為骨幹，加上呢班人活躍於公民社會，睇怕未來學民同學聯都會出盡法寶，邀請佢哋加入各自陣營。
七一遊行加深分歧
可以預期，學民同學聯未來鬥吸納大專生將會好戲連場，事實上早前至少喺兩件事上，兩個學生組織因意見不合曾傳出內訌，首先係六四集會之前一個周日嘅遊行，學民仔自行向警方申請不反對通知書，就令一直認為遊行毋需政府批准嘅學聯好不滿。
學民同學聯第二次短兵相接係七一遊行當日，底因係學民籌款吸金逾一百萬元，撇除佔領中環外冠絕泛民政黨團體，學民仔之後到特首辦公民抗命又全身而退，相反學聯籌款數目只有數萬元，加上有多名成員瞓身於中環遮打道預演佔中被捕，有人質疑學民仔走精面，講就無敵，做就有心無力咁話，加埋今次學民加入搶客行列，有意吸引大專生加入，雙方分歧會否進一步加深，相信不言而喻！