中環出更：泛民議員 九月唔敢放假
全國人大常委會將於八月底就二○一七年特首普選模式定下框架，政府同泛民主派都嚴陣以待。我哋早前就寫過，特首辦同多個相關政策局已劃定底死線，規定任何同政改可能有關嘅官員，要放假就要喺下月中前放晒佢外，最遲八月十五日要返港坐陣，準備呢場政改大戰。據聞唔少泛民立法會議員亦盡量唔會揀喺九月放假，以免喺發動佔中或大型遊行示威時缺陣。
單仲偕夫婦陪子延放假
其中民主黨議員單仲偕，原本打算趁立法會放暑假鬆一鬆，同太太去希臘小島旅行兼拍拖，但點知佢喺美國讀書嘅細仔，最近難得返咗嚟香港，喺一間科技公司實習。單仲偕兩公婆唔想揼低個仔，於是就押後假期，等囝囝八月底返美國開學，送埋佢上機之後，先至出發前往希臘，並已經訂好晒機票同酒店。
依家佔中三子揚言可能人大常委會一公布政改決定，就會提早發動佔中，學聯更聲稱可能會喺九月發動罷課，搞到佢心大心細，唔知到時去好定唔去好。如果再等多一年，又要面對區議會換屆選舉大戰，兩年後更加係立法會換屆選舉，同樣走唔開，認真惡搞。
卓妮