為咗推動三堆一爐，港府成日恐嚇市民，堆填區就嚟滿瀉，垃圾圍城危機迫在眉睫。其實，跛腳政府動輒得咎，寸步難行，咪話推動三堆一爐，只要唔好帶頭製造垃圾，已經功德無量咯。
唔係冤枉佢哋0架。按照當局規定，香港出版嘅新書，要預留五本複本畀康文署，其中兩本由圖書館採編組接收，分配到各區圖書館或者送畀非牟利機構。但原來康文署內部指引規定，所有上市公司刊物，包括季度業績報告、股東大會通知書同招股書等，即使新出版，一律列為「沒有保留價值」並註銷，直接當廢紙交畀回收公司處理。小數怕長計，呢類書籍三年嚟多達一萬六千項，都咪話唔得人驚。
港產官僚護樹不力係人都知，估唔到康文署居然淪為樹木殺手，簡直匪夷所思。姑且聽吓康文署點解畫，佢哋話喎，市民如果要睇上市公司刊物複本，可以到公共圖書館借閱香港交易所出版嘅光碟，或者上網查閱，所以圖書館無保留嘅必要。
好心卸責都搵個好啲嘅藉口，唔好侮辱市民智慧喇。一般市民就話識得上網，識得睇光碟，但好多老人家根本唔熟電腦科技，叫佢哋睇光碟或者上網搵資料，即係強人所難啫。退一步講吖，既然圖書館唔需要儲存複本，署方應該叫出版商送少兩本，咁咪唔使製造咁多垃圾，破壞環保囉。
講開又講，公立圖書館新書當垃圾，早就唔係新聞咯。今年初之嘛，中央圖書館被踢爆將三百箱合共逾萬冊圖書隨街擺，當廢紙咁賣，當中好多仲係新簇簇，連箱都未拆，你話係咪暴殄天物吖？係咪浪費資源吖？仲有吖，康文署採購新書求求其其，是是但但，從來唔諗有冇實際用途，以及有冇地方放，結果部分藏書焗住入庫，得物無所用。
當然喇，康文署官僚敷衍塞責，浪費公帑嘅例子又點止咁多吖。例如好多人訂咗體育場館後突然失蹤，康文署從來唔追究，搞到有場冇人用，有人冇場用，資源嚴重錯配，連審計署都曾經發表報告批評，可惜康文署意見接受，態度照舊，情況多年嚟都冇改善。
都係嗰句啦，政府靠得住，豬乸會上樹。港產官僚連圖書館藏書咁小嘅事都搞到烏龍百出，甩漏連連，旨意佢哋保護環境，盞嘥氣嘅啫。難為當年貪曾仲話要換回藍天白雲，簡直係笑話。講到底，堆填區就嚟爆滿，香港就快變成垃圾港，真係多得佢哋唔少0架。所以話，最冇保留價值嘅唔係書籍，而係碌碌無為嘅港產官僚至啱！