仲有幾日先夠成立兩年嘅網絡媒體《主場新聞》尋日突然宣布執笠！股東兼創辦人蔡東豪講咗好多個理由，包括恐懼、誤判同愧疚，加上長期入不敷支，以及唔想家人為佢擔憂，決定摺埋《主場》。不過，《主場》係呢兩年都未試過被人踩場恐嚇，而蔡又講過「一直當一盤生意咁做」，究竟《主場》摺埋嘅真正原因係咩，就只有佢自己先知喇！
《主場新聞》尋日下晝四點幾突然喺網站出咗一篇有蔡東豪署名嘅聲明，宣布即時結業。蔡就話，覺得好恐懼，話香港政治鬥爭氣氛令人極度不安，好多民主派人士被跟蹤、抹黑、翻舊帳，有股白色恐怖係社會蔓延，令佢過關返大陸都提心吊膽，加上一二年七月開張至今都係入不敷支，睇唔到《主場》仲有咩曙光。佢又覺得好愧疚，話對唔住屋企人，所以做咗呢個決定。
創辦人之一嘅梁文道話，蔡東豪告知因為長期入不敷支，打算摺埋《主場》，但又欲言又止，好似有難言之隱咁。據佢了解，《主場》依家約有十個員工，喺過去一年，蔡每個月都貼五十幾萬元出來，即至今最少蝕咗六百萬元。
據了解，蔡之前幫壹傳媒老闆肥佬黎旗下《蘋果日報》寫專欄，每月稿費豐厚，但今年壹傳媒要縮版，令蔡收入大減，唔知呢個係咪《主場》真正死因呢？